Asiaq – Kalaallit Nunaanni Misissueqqaarnerit (Greenland Survey)

Asiaq Kalaallit Nunaanni nunami pissutsinut inuiaqatigiinnut pingaarutilimmik siuneqartaqarlutik assiliartalersuinernik, nalunaarsuinernik, katersinermik, paasissutissiinernik aammalu siunnersuinernik suliaqartarpoq. Taakkununnga ilaapput nunami imermik ilisimatusarnernik, silaannarmik, nunami pisuussutinik atugassanik ilisimatusarnernik, nunamut uuttortaanernik, assiliartalersuinernik, nunaminertamik tunisinernik, sanaartukkanik nalunaarsuinernik, eqqakkat aqqutaannik assiliartalersuinernik, nunap ilusaanik, pilersaarusiornernik aammalu tunngaviusumik assiliartanik Kalaallit Nunaanni aqutsinermi allaffeqarfinnut, inuussutissarsiornermut aammalu ilisimatusarnermut atungassanik suliaqarnerit. Nalunaarsuutit tiguneqartarput aningaasaliinerni, suliniutinut tuniniaanerni aammalu ilisimatusarluni suliniutini, taamaattumik Asiaq suliamut tunngasut annertuut nunami nunanilu allani siaruaassimasumik piginnaasaqarluartunik toqqartukkanik suleqateqarluni sulianut ilisimaarinninneq annertooq ataavartuutippaa.

 

Uani annertunerusumik atuarit: www.asiaq.gl

 

Center for Arktisk Teknologi

Center for Arktisk Teknologi (ARTEK) Kalaallit Nunaanni Danmarkimilu suleqatigiinnermit pilersinneqarpoq Kalaallit Nunaanni teknikimik ilisimatusarneq atuartitsinerlu nukittorsarniarlugit. ARTEK Danmarks Tekniske Universitetiani (DTU) Institut for Byggeri og Anlægimut ilisimatusaammi ilaavoq, aammalu ilaatigut Sisimiuni Teknikimik Ilinniarfimmi angerlarsimaffeqarluni taamatullu DTU-mi Kgs. Lyngbymi aamma ilaalluni.

 

ARTEK-ip ilisimatusarnermi suliassaqarfiit sisamat sammisarai: Issittumi avatangiisimut teknologi, sanaartukkat aammalu nukissiuutit aaqqissuussaanerat, pilersaarusiorneq aammalu ataqatigiinnermut aaqqissuussinerit issittumi avatangiisimi qajannartup pingaartumik ingerlaartuaannarnissaanik piujuartitsineq. Anguniagaq ersarissoq tassaavoq Kalaallit Nunaanni inuiaqatigiit pisariaqartitaat, ineriartortitsineq aammalu teknologii pitsaanerpaat issittumi piujuartitsinissamik siuarsaasussat ilaatinneri ilsimatusarnerup tapersersussagai. Centerimi ilisimatusarneq Kalaallit Nunaanni issittumilu ilisimatusarfiit, oqartussat aammalu suliffeqarfiit attuumassutillit suleqatigalugit ingerlasarpoq.

 

Arktisk Teknologimi ingeniøritut ilinniarfik ARTEK-ip ataaniippoq. Ilinniarfik immikkut sammisanik tallimanik imaqarpoq: Sanaartorneq, atortorissaarutinik ikkussuineq, avatangiiseq, atortorissaarutit aammalu pilersaarusiorneq.

 

Nittartakkani: www.arktiskcenter.gl-imi aammalu www.arktisking.gl –imi annertunerusumik atuarit.

 

DCE – Nationalt Center for Miljø og Energi, Aarhus Universitet

DCE universitet tamakkerlugu ilisimaarinninnernik katersisarpoq, pingaartumik Institut for Bioscience-iminngaanniit aammalu Institut for Miljøvidenskab-iminngaanniit. DCE-mi Pinngortitaleriffik suleqatigalugu ingerlanneqartoq annertooq Kalaallit Nunaanni aatsitassanut ikummatissanullu misissuinerit atuinerillu pillugit avatagiisinut tunngasunik misissuineq nalilersuinerlu pivoq. Suliaq Aatsitassanut Ikummatissanullu oqartussat aatsitassarsiornermi ikummatissiornermilu ingerlatanut sulianut isumaginninnerannut ilanngussatut ingerlanneqarpoq.

 

Institut for Bioscience-mi aammalu Institut for Miljøvidenskab-imi sulisut Kalaallit Nunaanni misissuinernik aammalu nakkutilliinernik assigiinngitsunik Danmarkimi Energistyrelse og Miljøstyrelsen ataani Dancea-mit aningaasaliiffigineqarsimasunik suliaqarput. Tassani ilaapput assersuutigalugu Zackenbergimi avatangiisimik nakkutilliineq aammalu Nuummi Greenland Ecosystem Monitoring (GEM-programmi) ataani aammalu Kalaallit Nunaanni issittumilu akuutissanik mingutsitsisunik nakkutilliineq.

 

DCE-p nittartagaa: http://dce.au.dk/ takuuk.

 

De Nationale Geologiske Undersøgelser for Danmark og Grønland (GEUS)

GEUS tassaavoq ilisimatusarfik namminersortoq pituttorsimanngitsorlu qallunaat Energi-, Forsynings- og Klimaministeriumiata ataani inissisimasoq. GEUS-ip Danmarkimi, Kalaallit Nunaanni aammalu piffinni taakkununnga ilaasuni nunap pissusaanik ilisimatusarluni misissuineq akisussaaffigaa.

 

GEUS Danmarkimi Kalaallit Nunaanni pinngortitami pingaartimi atuisinnaanermut aammalu illersuinissamut sunniuteqarsinnaasunik pissutsinik qaffasissumik ilisimatusarnernik ingerlatsisarpoq.

 

GEUS nunamut tunngassuteqartunik qallunaat kalaallillu pisortani oqartussaannut pinngortitamut, avatangiisimut, silaannarmut, nukissiuutinut aammalu aatsitassanut ikummatissanullu apeqqutinut siunnersuisarpoq, taamatullu suliassaqarfinni taakkunani oqartussat suliassaannik ingerlatsisarluni. GEUS Nuummi allaffeqarpoq.

 

GEUS-ip sulineranut paasissutissat aammalu saqqummersitat nittartakkami uani: www.geus.gk –imi nassaarineqarsinnaapput.

 

Pinngortitaleriffik

Pinngortitaleriffik Kalaallit Nunaanni Namminersorlutik Oqartussat pinngortitami ilisimatusarnermut sullissivigaat. Ilisimatusarfik 1995-imi Nuummi pilersinneqarpoq siunertaralugu:

• Kalaallit Nunaanni eqqaanilu pisuussutit uumassusillit piujuartussamik atorneqarsinnaanerannut ilisimatusarnikkut tunngavilersuilluni aqqutissiuussinissaq.
• Avatangiiseq aammalu uumassusillit assigiinngiiaartiternerat isumannaarniarlugu.
• Kalaallit Nunaanni Namminersorlutik Oqartussanut uumassusillit pillugit siunnersuineq aammalu minnerunngitsumik ilisimatusarnermi inernerit tamanut ammasumik saqqummiunnissaat.

 

2009-mi Silap Pissusianik Ilisimatusarfik Pinngortitaleriffimmut ilannguppoq. Ilisimatusarfik nunat tamalaat akornanni attaveqarfiit ilagaat, issittumi pinngortitap ataqatigiinneranut aammalu inuiaqatigiinni silaannaap sunniutaanik ilisimatusarnernik ingerlatsisoq. Ilisimatusarfiup qitiusumik piginnaasaqarfii tassaapput immap pissusaanik ilisimatusarneq aammalu immami inuussutissat uiguleriaat minnerpaartaannut ilisimatusarneq.

 

2014-imi ilisimatusarfiup suliassaqarfittut immikkoortortaqarfii Avatangiisinut Aatsitassanullu Immikkoortortaqarfimmik allineqarput. Immikkoortortaqarfiup Kalaallit Nunaanni Namminersorlutik Oqartussanut Kalaallit Nunaanni nunap ataanik atuinermi issittummi avatangiisinut illersuinissaq pillugu pituttorsimanngitsumik siunnersuineq suliaraa.

 

Pinngortitaleriffik aammalu suliassaqarfinni immikkoortortani ingerlatat pillugit annertunerusumik nittartakkami: www.natur.gl –imi atuartoqarsinnaavoq.